ບໍລິສັດພອນສັກ ກໍ່ສ້າງຂົວ-ທາງ ຈຳກັດ

ໂຄງການກໍ່ສ້າງທີ່ສຳຄັນອັນໜຶ່ງທີ່ພິສູດໄດ້ວ່າມີຄວາມທ້າທາຍຫຼາຍຕໍ່ ກຸ່ມບໍລິສັດ ພອນສັກ ຈຳກັດ ແມ່ນ 'ໂຄງການຍົກຍ້າຍເມືອງກະລຶມໃໝ່', ເຊິ່ງມີເນື້ອທີ່ທັງໝົດ 1,502 ເຮັກຕາ, ຫ່າງຈາກເມືອງກະລຶມເກົ່າປະມານ 32 ກມ. ເນື່ອງຈາກເມືອງກະລຶມເກົ່າຕັ້ງຢູ່ໃນພູມສັນຖານເປັນເຂດພູດອຍ ແລະ ເຂົ້າເຖິງໄດ້ຍາກ, ຈຶ່ງຂາດສິ່ງອໍານວຍຄວາມສະດວກທີ່ຈຳເປັນທັງໝົດເຊັ່ນ: ໂຮງຮຽນ, ສຸກສາລາ ແລະ ລະບົບສາທາລະນູປະໂພກພື້ນຖານອື່ນໆ ແລະ ຖືວ່າເປັນເມືອງໜຶ່ງທີ່ທຸກຍາກ ແລະ ດ້ອຍພັດທະນາທີ່ສຸດ. ເມືອງກະລືມ​ໃໝ່​ ​ແມ່ນ​ໄດ້​ຖືກຈັດສັນຂຶ້ນເພື່ອສະໜອງ​ບັນດາ​ສິ່ງ​ອຳນວຍ​ຄວາມ​ສະດວກ​ທັງ​ໝົດ​ນີ້ ​ລວມທັງ​ເຮືອນຢຸ່ອາໃສ​ທີ່ປອດໄພທີ່​ໄດ້​ຮັບ​ການ​ກໍ່ສ້າງ​ໃໝ່, ສຳນັກງານລັດ, ສູນການຄ້າ/​ທຸລະ​ກິດ, ລະບົບ​ນ້ຳປະປາ, ລະບົບ​ຊົນລະປະທານ, ​ໄຟຟ້າ ​ແລະ ​ເສັ້ນທາງ​ຄົມມະນາຄົມເຂົ້າ​ເຖິງ. ໂຄງການດັ່ງກ່າວໄດ້ເລີ່ມມາແຕ່ ເດືອນມັງກອນ ປີ 2012 ແລະ ໄດ້ສຳເລັດໃນ ປີ 2014, ໃນນັ້ນ ປະມານ 2,500 ຄອບຄົວໄດ້ຍົກຍ້າຍອອກຈາກເມືອງກະລຶມເກົ່າ.

ໃນປີ 2017, ກຸ່ມບໍລິສັດ ພອນສັກ ຈຳກັດ ຍັງໄດ້ດຳເນີນໂຄງການຍົກຍ້າຍຈັດສັນປະຊາຊົນທີ່ໄດ້ຮັບຜົນກະທົບຈາກໂຄງການກໍ່ສ້າງເຂື່ອນໄຟຟ້ານໍ້າເທີນ 1 (NT1PC) ເຊິ່ງລວມມີການກໍ່ສ້າງເຮືອນຈັດສັນ, ພື້ນຖານໂຄງລ່າງສາທາລະນະ (ໂຮງຮຽນ, ໂຮງໝໍ, ຕະຫຼາດ, ຫ້ອງການບ້ານ,ສະໂມສອນ, ວັດວາອາຮາມ), ຝາຍປ້ອງກັນນໍ້າຖ້ວມ, ຮົ້ວກັ້ນເຂດກະສິກຳ ແລະ ລະບົບຊົນລະປະທານ. ໂດຍມີປະຊາຊົນ ຈໍານວນ 624 ຄົວເຮືອນ ໄດ້ຖືກຍົກຍ້າຍຈັດສັນໄປຢູ່ບ່ອນຕັ້ງຖິ່ນຖານໃໝ່ຢ່າງຖາວອນແລ້ວ.